Amakipe abiri muri ane ahagarariye u Rwanda mu mikino ya Shampiyona Nyafurika ya ‘CAVB Club Championship 2026’ ariyo APR VC, Police VC, mu makipe ane ataratsindwa mu mikino ine imaze gukinwa mu matsinda.
Mu ijoro ryo ku Cyumweru, tariki ya 26 Mata 2026, ni bwo hakinwe imikino y’umunsi wa Kane ibanziriza iya nyuma mu matsinda y’iri rushanwa riri kubera i Kigali ku nshuro ya 47.
Umukino wabanje gukinwa ni uwa Police VC na Ghana Army bari kumwe mu Itsinda C.
Ikipe ihagarariye u Rwanda yatsinze Ghana Army VC amaseti 3-0 (25-20, 25-20, 25-23), ihita ikatisha itike ya ⅛ ndetse yizera gusoza imikino y’amatsinda iri ku mwanya wa mbere.
Hakurikiyeho umukino Kepler VC yatsinzwe na Al Ahly yayitsinze amaseti 3-0 (25-15, 25-19, 25-20) bari kumwe mu Itsinda B.
Uyu mukino wabaye uwa mbere Kepler VC itakaje muri iri rushanwa REG VC yatsinze Atlético Clube Do Mindelo yo muri Cape Verde amaseti 3-0 (25-14, 25-19, 25-13) naho bigoranye, APR VC yatsinze Nigeria Customs amaseti 3-2 (25-21, 21-25, 21-25, 26-24, 15-9) zombi zibona itike ya ⅛ muri iri nyafurika.
Kugeza ubu amakipe ane arimo APR VC na Police VC zo mu Rwanda, Al Ahly SC yo mu Misiri na Port Autonome De Douala yo muri Cameroun ni yo ayoboye amatsinda yayo uko akurikirana, aho afite amanota 12 mu mikino ane amaze gukina.
Imikino yabereye muri BK Arena yabanjirijwe n’uwo Sports-s yo muri Uganda yatsinzemo AS INJS yo muri Côte d’Ivoire amaseti 3-2 (29-27, 25-18, 18-25, 19-25, 18-16) mu gihe Petrojet SC yo mu Misiri yatsinze
Litto Team yo muri Cameroon 3-0 (25-12, 25-17, 26-24).
Mu mikino 12 yari iteganyijwe, itandatu yabereye muri Petit Stade aho yabimburiwe n’uwo General S yo muri Kenya yatsinze biyoroheye Rukinzo VC yo mu Burundi amaseti 3-0, Equity Bank yo muri Kenya yatsinze Cameroon S amaseti 3-1 (25-22, 25-20, 20-25, 25-22) Port Autonome yo muri Cameroon itsinda Kalibi yo muri Ghana 3-0 (25-13, 25-15, 25-14).
Mu yindi mikino, Faith Union yo muri Maroc yatsinze Wolaitta VC yo muri Ethiopia amaseti 3-0 (25-22, 25-12, 25-23), Kenya Ports Authority yo muri Kenya yatsinze Prisons VC yo muri Tanzania amaseti 3-0 (25-15-25-23-25-17) mu gihe Nemo Stars yo muri Uganda yatsinze Black Rhinos VC yo muri Zimbabwe amaseti 3-0 ( 25-23, 25-19, 25-14).
CAVB Menʼs Club Championship 2026 ikomeza kuri uyu wa Mbere, hakinwa umunsi wa gatanu isoza iyo mu matsinda.
Imikino itatu y’amakipe y’u Rwanda irabera muri BK Arena aho Police VC ikina na Kenya Ports Authority, Kepler VC ikine na Equity Bank, mu gihe APR VC ihura na project SC yo mu Misiri. Muri Petit Stade, REG iracakirana na Kalibi yo muri Ghana.
