Alex Muyoboke umwe mu bagize uruhare rukomeye mu kuzamura impano z’abahanzi nyarwanda kubera ibikorwa bye byo gufasha abanzi batandukanye, avuga ko umwaka wa 2019 ufite ishusho yihariye ku muziki nyarwanda.
Mu kiganiro yagiranye n’Umuseke, Muyoboke yavuze ko ugereranyije n’indi myaka yabanje, 2019 yagarageyemo impinduka kuko habonetsemo abahanzi bafite impano zifatika.
Ati “2019 haje abana bafite impano kandi ugasanga buri wese ari umuhanga. ni ikigaragaza ko uyu mwaka wagize abahanzi benshe kandi ubona ko bashoboye.”
Avuga ko muri uyu mwaka hari abahanzi basa n’abazamukiye rimwe bane cyangwa batanu mu gihe mu myaka yayibanjirije atari ko byari bimeze.
Muri uyu mwaka hagaragaye abahanzi bafite impano zikomeye nka Amaron, Sintex, Kevin Kade, Kevin Skaa, Frank watsinze I’m the future na mugenzi we Lionel.
Muyoboke unafite imwe muri Kompanyi zizamura abahanzi nyarwanda ubu inakorana n’Umuhanzikazi Alioni Buzindu, yanagarutse ku gikorwa cyo guhemba abahanzi bitwaye neza kizwi nka Music Award Rwanda cyatangiye muri Kanama 2018 kigahita kirangirira aho.
Iki gikorwa Muyoboke yari afatanyije na Nyakwigendera Dennis Nsanzamahoro wari uzwi nka Rwasa muri Film, Muyoboke avuga ko cyakomwe mu nkokora n’urupfu rwa mugenzi we.
Ati “Haje kubamo icyo kintu kikimvunnye cyane kuko ni igitekerezo nagiranye na we.”
Avuga ko nubwo uwo bagitangiranye yitahiye ariko kitazagenda buheriheri kuko yaba amubereye ikigwari kandi yaramusize.
Ati “Ntabwo ikivi natangiranye na we nagisoreza ku rugendo rwe, kandi vuba nzababwira uko gahunda zimeze.”
Muri iki kiganiro cyagarutse ku ngingo zinyuranye, Muyoboke uherutse gutandukana na Charly na Nina, avuga ko yahise akomezanya na Alioni kandi ko ibikorwa bye biri kugenda neza.
Avuga ko kuva yatangira gukorana n’uyu muhanzikazi, yashyize hanze indirimbo yise ‘Tuza’ yakoranye na Bruce Melodie, ngo kandi yarakunzwe cyane.
Ati “Nubwo nafatanyije akazi kakambana kenshi hits zarabonetse.”
Muyoboke yakoranye na bahanzi bakomeye mu Rwanda barimo Tom Close, Urban Boyz, Dream Boys bose batwaye PGGSS ndetse na Charly na Nina.
Nicolas YUSUF
UMUSEKE.RW