Police Women VC yegukanye igikombe cy’Irushanwa ryo kwibohora ( Amafoto)

Ikipe ya Polisi y’u Rwanda y’umukino w’intoki wa Volleyball mu bagore (Police Women VC), kuri iki Cyumweru tariki ya 9 Nyakanga, yegukanye igikombe cy’irushanwa ryo kwibohora ku nshuro ya mbere (Rwanda Volleyball Liberation Cup Tournament).

Ni nyuma yo gutsinda ikipe ya APR VC amaseti 3-1, ku mukino wa nyuma wabereye ku kibuga cya BK Arena.

Iri rushanwa, ryatangiye ku wa Gatandatu tariki 8 Nyakanga, ryitabirwa n’amakipe 6 y’abagore ari yo Police VC, APR VC, RRA VC, IPRC Huye, IPRC Kigali na Ruhango VC.

Umukino wa nyuma watangiye ushyushye, urangwa no guhangana ku mpande zombi, ariko Police VC ikaza kujya inyuzamo igashyiramo ikinyuranyo cy’amanota, aho iseti ya mbere yaje kurangira ku manota 25-14 ya APR VC, iseti ya kabiri Police VC iyitsinda ku manota 25-18, mu gihe iseti ya gatatu yaje kurangira APR iyitsinze amanota 25-20 bakina iseti ya Kane aho Police VC yayitsinze ku manota 25-14, Police VC yegukana igikombe ityo.

Umutoza w’ikipe ya Police VC, Hatungimana Christian yavuze ko gutwara iki gikombe babikesha gukora cyane kandi bagashyira hamwe nk’ikipe.

Yagize ati: “Biradushimishije kuba tubashije gutwara iki gikombe cyo kwibohora, ibi kubigeraho bituruka mu gukora cyane kandi tugashyigikirana haba mu kibuga imbere no mu buzima busanzwe.

Ni nyuma y’uko twegukanye ikindi gikombe cyo kwibuka Jenoside yakorewe abatutsi mu 1994 (Genocide memorial tournament) bityo intego dufite ni iyo kwegukana ibikombe byose tuzitabira.”

Rwanda Volleyball Liberation Cup, ni irushanwa ritangijwe uyu mwaka, rifite intego yo guha agaciro urugamba rwo kubohoza u Rwanda no guhagarika Jenoside yakorewe Abatutsi mu 1994 rizajya riba ngarukamwaka.