Bayern Munich na Real Madrid ziri mu makipe ane yageze muri 1/8 cya UEFA Champions League ku wa Gatatu, mu gihe Manchester United ishobora gusezererwa nyuma yo gutsindwa na FC Copenhagen ibitego 4-3.
Imikino y’Umunsi wa Kane w’Amatsinda y’iri rushanwa rihuza ayabaye aya mbere iwayo ku Mugabane w’u Burayi, yabaye ku wa 8 Ugushyingo 2023, yasize igikomeje kugarukwaho cyane ari ugutsindwa kwa Manchester United.
Iyi kipe yo mu Bwongereza yari yerekeje muri Danemark, yabanje gutsinda ibitego bibiri bya Rasmus Højlund ku munota wa gatatu n’uwa 28, ariko ikarita itukura yahawe Marcus Rashford wakiniye nabi Elias Jelert ku munota wa 42, ihindura umukino.
Mohamed Elyounoussi na Diogo Gonçalves bishyuriye Copenhagen mu minota 13 y’inyongera mu gice cya mbere. Manchester United yongeye kuyobora umukino kuri penaliti yatsinzwe na Bruno Fernandes ku munota wa 69, ariko ibitego bya Lerager na Bardghji ku munota wa 83 n’uwa 87, bituma itsindwa 4-3.
Kuri ubu, iyi kipe itozwa na Erik ten Hag iri ku mwanya wa nyuma mu Itsinda A n’amanota atatu, isigaje gusura Galatasaray no kwakira Bayern Munich.
Bayern yo yamaze kubona itike ya 1/8 kuko ibitego bibiri byinjijwe na Harry Kane byayifashije gutsinda Galatasaray 2-1, igira amanota 12 kuri 12 mu gihe andi makipe abiri ayikurikiye afite amanota ane.
Mu Itsinda B, Arsenal yagize amanota icyenda ku mwanya wa mbere ibikesha gutsinda Seville ibitego 2-0 byinjijwe na Leandro Trossard na Bukayo Saka ku munota wa 29 n’uwa 64, mu gihe PSV Eindhoven yanganyije amanota atanu na Lens nyuma yo kuyitsinda igitego 1-0.
Real Madrid yageze muri 1/8 nyuma yo gutsinda SC Braga ibitego 3-0 byinjijwe na Brahim Díaz, Vinícius Júnior na Rodrygo, iyobora Itsinda C n’amanota 12 kuri 12, ikurikiwe na Napoli yagize amanota arindwi nyuma yo kunganya igitego 1-1 na Union Berlin yasezerewe kuko ifite inota rimwe.
Andi makipe abiri yakomeje ni ayo mu Itsinda D aho Real Sociedad yagize amanota 10 nyuma yo gutsinda Benfica ibitego 3-1, iyanganya na Inter Milan yatsindiye FC Salzburg iwayo igitego 1-0 cya Lautaro Martínez.
Kuwa Kabiri, Manchester City na RB Leipzig ni zo zari zabonye itike yo kurenga amatsinda, bivuze ko kuri ubu hamaze gukomeza amakipe atandatu mu gihe andi 10 azamenyekana ubwo iri rushanwa rizaba ryakomeje tariki ya 28-29 Ugushyingo n’iya 12-13 Ukuboza 2023.
