Ku mbuga nkoranyambaga hakomeje gukwirakwira videwo y’amasegonda igaragaza abantu bapakira udufuka twa sima mu Mbangukiragutabara ibitaro bya Gakoma byo mu karere ka Gisagara byatije ikigo nderabuzima cya Save. Umwe mu bumvikanamo, binashoboka ko ari we wayafashe na we yumiwe, agira ati “kuva mvuye i Burayi ni bwo mbonye ibi bintu.” Si we gusa kuko abayibonye na bo batunguwe, bamagana abakoze iri kosa.
Umuyobozi Mukuru w’ibitaro bya Gakoma, Dr Uwamahoro Evelyne, kuri uyu wa 26 Ugushyingo 2024 aganira n’ikinyamakuru IGIHE dukesha iyi nkuru yavuze ko sima yapakirwaga muri iyi Mbangukiragutabara yari iyo kwifashishwa mu gusana ikigega cyo mu kigo nderabuzima cya Save kuko byagaragaye ko gishobora gusenya inyubako zaho.
Yagize ati “Hari ikigega, aho kugira ngo amazi ajyemo ahubwo ashobora kuba yasenya izindi nyubako. [Sima] yari iyo ngo gukoresha icyo kigega ariko uko byaba bimeze kose, icyo ari cyo cyose ntabwo cyemerewe kujya mu Mbangukiragutabara, keretse umurwayi.”
Dr Uwamahoro yatangaje ko abakozi bagize uruhare mu gupakira sima muri iyi Mbangukiragutabara, barimo umuyobozi wacyo, umushoferi n’umuforomo, bahagaritswe by’agateganyo, kandi ko bashobora no guhagarikwa burundu kubera ko bakoze ikosa rikomeye ry’akazi.
Yagize ati “Ibiteganywa n’amategeko ni byo dukora ku mukozi wakoze amakosa yo mu rwego rw’akazi. Umukozi [shoferi] ubu ntabwo ari mu kazi. Yabaye ahagaritswe ariko birakomeza bikurikiranwe ku buryo bishobora no kuba byanavamo guhagarikwa burundu kuko ni ikosa rikomeye. Kugeza uyu mwanya, ari umukozi, ari umushoferi, ari umuyobozi w’ikigo nderabuzima bose ntabwo bari mu kazi.”
Ibitaro bya Gakoma byamaze kwambura ikigo nderabuzima cya Save iyi Mbangukiragutabara nyuma y’aho bikoze iri kosa. Dr Uwamahoro yahumurije abaturage bo muri Save, abamenyesha ko bazakomeza guhabwa serivisi z’ubuvuzi nk’uko bisanzwe.
Yagize ati “Bazakomeza bahabwe serivisi nk’uko zatangwaga kuko n’ubundi nk’uko bafashwaga n’ibitaro bya Kabutare kuko ni byo bihegereye cyane, n’ubundi turakomeza tubirebeho, dufatanye na Minisiteri y’Ubuzima, turebe ikigiye gukorwa. Serivisi bari buyihabwe uko bigomba.”
Dr Uwamahoro yatanze icyizere ko Imbangukiragutabara ishobora gusubizwa ikigo nderabuzima cya Save nyuma yo kongera kwigisha ubuyobozi bwacyo ndetse n’abakozi bacyo.
