Rayon Sports yasinyishije rutahizamu w’Umunya-Cameroon Banen Phlippe Arthur amasezerano y’imyaka ibiri avuye muri Union de Douala.
Iyi kipe ifite igikombe cya Shampiyona y’umwaka ushize w’imikino, ikomeje kwiyubaka muri iri soko ry’igura n’igurisha, igira abakinnyi bataha izamu.
Banen Phlippe Arthur wasinye imyaka ibiri muri Rayon Sports akaba abaye umukinyi wa kane isinyishije avuye hanze y’u Rwanda muri iri soko ry’igura n’igurisha ryafunguwe tariki ya 15 Mutarama 2020.
Iyi kipe kandi yaguze abakinnyi barimo Drissa Dagnogo ukomoka muri Côte d’Ivoire, Kayumba Soter wavuye muri AFC Leopards yo muri Kenya na Niyonzima Ally wakinaga muri Oman.
Aba bakinnyi Rayon Sports yamaze kugura bategerejwe mu irushanwa ry’Itwari ritangira mu mpera z’iki Cyumweru iyi kipe ihura na Police FC.
Rayon Sports ubu iri ku mwanya kabiri muri Shampiyona n’amanota 38, irarushwa amanota ane na mukeba wayo APR FC iyoboye urutonde n’amanota 42.
Iyi kipe ikomeje guhatanira igikombe cya shampiyona izongera gukina umukino wayo wo ku munsi wa 19 wa shampiyona ku Cyumweru tariki ya 9 Gahyantare 2020, ihura na Busera FC.
Jean Paul MUGABE
UMUSEKE.RW