Ikipe ya APR FC yanganyije na Gasogi United ubusa ku busa mu mukino w’umunsi wa 13 wa shampiyona, uba umukino wa kabiri wikurikiranya Ikipe y’Ingabo itakajemo amanota.
Uyu mukino wabaye ku mugoroba wo kuri uyu wa Kabiri tariki 5 Ukuboza 2023, kuri Pele Stadium.
Mu mukino uryoheye ijisho amakipe yombi yatangiye asatirana ku mpande zombi.
Ku munota wa 4′ APR FC yabonye amahirwe yo gufungura amazamu ku ishoti rikomeye Niyomugabo Claude yateye, rikorwaho na myugariro wa Gasogi United, umupira ujya muri koruneri. Usubijwe mu kibuga, Umunyezamu Dauda awukuramo.
Ku munota 13′ Gasogi United nayo yabonye uburyo bwo gustinda ku ishoti rikomeye ryatewe na Ishimwe Kevin rifatwa na Ndzila Pavelh wa APR FC.
Iminota 30 ya mbere y’iki gice yihariwe na Gasogi United yateye amashoti atatu agana mu izamu.
Ku munota wa 36′ APR FC yongeye kubona amahirwe ku mupira winjiranywe na Ndayishimiye Dieudonne, awuhinduye ugera kuri Mbaoma wagowe no kuwukina, urakomeza inyuma, Apam wari hafi kuwukina Muderi Akabar aratabara awushyira muri koruneri.
Igice cya Mbere cyarangiye amakipe yombi anganyije ubusa ku busa
Mu gice cya Kabiri APR FC yatangiye yataka izamu rya Gasogi United ariko ba myugariro bakomeza kwihagararaho.
Ku munota wa 64′ APR FC yabonye uburyo bwo gustinda igitego kuri koruneri yatewe na Kwitonda Bacca, usanga Apam Bemol ushyizeho umutwe, Umunyezamu Dauda agarurira umupira ku murongo.
Ku munota 67′ APR FC yahushije uburyo bwabazwe nyuma yaho rutahizamu Victor Mbaoma arobye umunyezamu Dauda, umupira unyura hejuru y’izamu gato.
Ku munota wa 70′ Gasogi United yongeye gusatira ibona koruneri ebyiri zikurikirana, ariko Nshuti Innocent akiza izamu.
Ku munota wa 90+3′ APR FC yabonye amahirwe yo gutsinda igitego cyari gutuma ikomeza gushyiramo ikinyuranyo Nandi makipe kuri koruneri yatewe na Nshimirimana Ismael Pitchou, umupira ushyirwaho umutwe na Yunussu ujya hejuru y’izamu.
Umukino warangiye amakipe yombi anganyije ubusa ku busa APR FC itakaza amanota atatu mu mikino ibiri yikurikiranye muri shampiyona.
APR FC yahise igira amanota 27 iguma ku mwanya wa Mbere mu gihe Gasogi United yafashe umwanya wa Gatandatu n’amanota 18.
Uko indi mikino yagenze uyu munsi
Amagaju 0-2 Musanze
Bugesera FC 4-2 Police FC
Gorilla FC 0-2 Sunrise FC
Marine 3-2 Etoile de l’Est
Imikino iteganyijwe kuri uyu wa Gatatu tariki 6 ukuboza 2023
Etincelles izakira AS Kigali Saa Cyenda kuri Stade Umuganda
Mukura VS izakira Kiyovu Sports Saa Cyenda kuri Stade mpuzamahanga ya Huye
Rayon Sports izakira Muhazi United Saa Kumi n’ebyiri kuri Kigali Pele Stadium.
