Sheebah Karungi na Ross Kana bashyizwe ku rutonde rw’abahanzi n’abanyarwenya bazasusurutsa igitaramo ngarukakwezi cya “Comedy Store”, kimwe mu bikomeye bikomeje gihindura isura y’urwenya muri Uganda.
Ni igitaramo gihuriza hamwe ibyamamare mu muziki, mu mikino y’urwenya no mu myidagaduro rusange, kikaba gitegurwa n’umunyarwenya ukomeye Alex Muhangi, umaze kubaka izina riremereye mu gutegura ibirori bikomeye mu Karere.
Iyi nshuro iki gitaramo kizaba ku wa 26 Ugushyingo 2025. Harimo urutonde rw’abahanzi bakomeye, abanyarwenya bubatse izina ndetse n’indirimbo zitezwe gufasha abitabira guseka no kwidagadura mu buryo bwisumbuye.
Mu myaka ishize, “Comedy Store” yabaye urubuga rukomeye ruhuza ibyamamare mu mpano zitandukanye. Ni ihuriro ritanga amahirwe ku banyarwenya n’abahanzi bo mu byiciro bitandukanye, rikabaha amahitamo yo kureshya imbaga y’abantu bifuza ibitwenge n’umuziki w’umwimerere.
Muri uyu mwaka, nk’uko byatangajwe n’abategura, icyo gitaramo kizabera UMA Show Grounds Lugogo, ahantu hafunguka kandi habereye ibitaramo binini, aho abafana bategerezanyije amatsiko umunsi nyirizina.
Mu bazasusurutsa iki gitaramo harimo amazina akomeye mu ruganda rwa muzika ya Uganda nka Sheebah Karungi, Irene Ntale, Vinka, Aziz Azion, Lydia Jazmine n’abandi bafite inyota yo kongera gukorana n’abafana babo mu buryo bwa “Live’.
Ku rundi ruhande, urwenya ruzaturuka ku banyabigwi barimo Madrat & Chiko, Maulana & Reign, Bobi Brown & Nilo Nilo, MC Mariachi, n’abandi bahanzi b’urwenya bafite izina rikomeye mu gihugu.
Aha kandi hiyongeraho n’isura nshya y’umuhanzi w’Umunyarwanda Ross Kana, watangiye kwigarurira umutima w’abanyafurika mu kwandika no gutambutsa ubutumwa bwihariye.
Kuboneka kwe kuri uru rutonde ni ikimenyetso cy’uko Comedy Store ikomeje gufungura imiryango y’urwego rw’akarere.
Mu bitezwe cyane harimo Dr. Hillary Okello, umwe mu banyarwenya b’imbaraga muri Uganda, witeguye gutanga imyiyerekano yuje ubuhanga n’imivugo isekeje imaze kumuhoza ku mwanya w’icyitegererezo mu mutwe w’abakunzi ba Comedy.
Uretse guteranira i Kampala, Okello azahita akomereza urugendo rwe i Kigali, aho agomba kwitabira Gen-z Comedy Show izabera Camp Kigali ku wa 27 Ugushyingo 2025.
Kuba agiye kwitabira ibitaramo bibiri bikomeye mu minsi ikurikiranye, byazamuye amatsiko n’ayo mu Rwanda bategereje kumubona mu buryo bwa Live.
Ibirori biteguye mu buryo bw’umwuga, abafana bakaba ari bo nyamukuru
Iki gitaramo kizayoborwa na Kalela & Bree, abamaze kumenyekana mu kuyobora ibitaramo bikomeye.
Kuva yaboneka, Comedy Store yubatse umuco mushya wo guseka no kwidagadura ku rwego rw’igihugu, none ikomeje kugera kure mu rwego rwo guhuriza hamwe abahanzi n’abanyarwenya bo mu bihugu bitandukanye.
Uru rutonde ruriho Sheebah, Ross Kana, Irene Ntale, Vinka n’abandi, ruragaragaza ko iyi nshuro izaba ikomeye ku rwego rwo hejuru kandi itazibagirana.
Ku bakunzi b’urwenya n’umuziki, uyu ni umwanya wo kongera guhurira hamwe, guseka mu buryo bw’imbitse, no kwizihirwa n’abahanzi batandukanye bari ku isonga mu karere.
Ross Kana agiye guhurira ku rubyiniro na Sheebah muri Uganda mu gitaramo cy’ibyamamare cya “Comedy Store”
Sheebah Karungi agiye kongera gutarama muri “Comedy Store” i Lugogo muri Uganda