Ishyirahamwe ry’Umupira w’Amaguru mu Rwanda (FERWAFA) ryasabye amakipe y’Icyiciro cya Mbere n’icya Kabiri kwiyandikisha mu Gikombe cy’Amahoro cyari kimaze imyaka ibiri kitaba.
Kuri uyu wa Kabiri, tariki ya 8 Gashyantare 2022, ni bwo FERWAFA yandikiye amakipe iyamenyesha ko “irushanwa ry’Igikombe cy’Amahoro cy’umwaka wa 2022 riteganywa gutangira mu kwezi kwa Gatatu 2022.”
Yakomeje ivuga ko “amakipe ashaka gukina iryo rushanwa yiyandikisha bitarenze tariki ya 25 Gashyantare 2022.”
Amakipe yongeye kumenyeshwa ko asabwa kwishyura ibihumbi 100 Frw nk’uko byagendaga mu gihe cyo kwiyandikisha.
Igikombe cy’Amahoro gitanga ikipe iserukira u Rwanda muri CAF Confederation Cup, cyari kimaze imyaka ibiri kitaba bitewe n’icyorezo cya COVID-19.
Cyaherukaga gukinirwa mu 2019 aho cyegukanywe na AS Kigali itsinze Kiyovu Sports ibitego 2-1 ku mukino wa nyuma.
Icyorezo cya COVID-19 cyageze mu Rwanda muri Werurwe 2020 hamaze gukinwa amajonjora abiri y’iri rushanwa, rigeze muri 1/8, byatumye riseswa rifatwa nk’iritarabayeho.