Mu gihe Israel Mbonyi akomeje imyiteguro y’ibitaramo azakorera i Dar Es Salaam muri Tanzania hagati ya tariki 2-3 Ugushyingo 2024, kuri ubu amatike yo kwinjira mu gitaramo cye kizitabirwa n’abanyacyubahiro yamaze gushira.
Amakuru y’ibanze ahari agaragaza ko amatike y’ibihumbi 500 TZs (arenga ibihumbi 240 Frw) y’igitaramo cyagenewe abanyacyubahiro (VVIP) gitegerejwe kubera ahitwa ‘Mlimani City,’ ku wa 2 Ugushyingo 2024 yamaze gushira ku isoko.
Ni mu gihe itike ya make y’iki gitaramo yo iri kugura ibihumbi 100 TZs, hafi ibihumbi 50 Frw, naho iya VIP ikagura ibihumbi 300 TZs (hafi ibihumbi 150 Frw).
Bukeye bw’iki gitaramo, ku wa 3 Ugushyingo 2024, Israel Mbonyi azahita akorera igitaramo cya rusange ahitwa ‘Leaders club’ aho kwinjira bizaba ari ibihumbi 20 000 TZs (hafi ibihumbi 10 Frw) mu myanya isanzwe n’ibihumbi 50 TZs (hafi ibihumbi 25 Frw) mu myanya y’icyubahiro.
Israel Mbonyi yatumiwe mu bitaramo ‘Wakati wa Mungu’ bigiye kuba ku nshuro ya gatatu akazaba ataramana n’abandi baramyi b’amazina akomeye muri Tanzania nka Rehema Simfukwe, Joel Lwanga n’abandi benshi.
Byitezwe ko Israel Mbonyi azava muri Tanzania ahita yinjira mu myiteguro y’igitaramo afite i Kigali muri BK Arena ku wa 25 Ukuboza 2024.
