Kigali: Abanyonzi bahawe casques zo gukoresha mu kazi

Kuri uyu wa Gatanu mu nzu mberabyombi y’Umujyi wa Kigali habereye inama yahuje ishami rya Polisi ishinzwe umutekano mu muhanda  n’abafatanyabikorwa bayo barimo n’abanyozi. Hakozwe igikorwa cyo guha abanyonzi ingafero zirinda umutwe n’ama julets yerekana ko aho baherereye mu rwego rwo gukumira impanuka ‘zabibasiraga.’

Amafoto agaragara ku rubuga rwa Twitter rw’umujyi wa Kigali yerekana umwe mu banyonzi yambara iriya helmet ndetse na julet yagenewe abanyonzi kugira ngo bakore akazi mu mutekano.

Abanyonzi kandi bazajya bambara akantu gafite ikoranabuhanga ryerekana amerekezo bagiye gukatiramo.

Umuyobozi wungirije w’umujyi wa Kigali ngo yabwiye abari mu nzu mberabyombi y’inyubako y’Umujyi wa Kigali ko iriya ngofero n’iriye julet bitanzwe mu rwego rwo gutuma abakoresha amagare mu bucuruzi babukora mu mutekano.

Yavuze ko kandi biri mu kerekezo cy’umujyi wa Kigali cyo guha abawutuye umutekano kandi bagakora akazi kabo neza.

Umuyobozi w’ishami rya Polisi rishinzwe umutekano wo mu muhanda CP Rafiki Mujiji mu kiganiro aherutse guha itangazamakuru yavuze ko abenshi mu bahitanwa cyangwa bakamugazwa n’impanuka zo mu muhanda baba ari abakoresha amagare.

Avuga kandi ko Polisi izakomeza kubashishikariza gukurikiza umuburo bahabwa muri gahunda ya Gerayo Amahoro kuko igamije kurokora ubuzima  bwabo.

Umuseke wageregeje kuvugana n’ubuyobozi bw’Umujyi wa Kigali kugira ngo hamenyekane uko gutanga ziriya ngofero bizakorwa n’igiciro cyazo ariko ntiturabona igisubizo.

Jean Pierre NIZEYIMANA

UMUSEKE.RW