Itsinda B
England 183-45 Rwanda
Zimbabwe 97-100 Pakistan
Itsinda C
Ireland 156-107 Indonesia
New Zealand 72-68 West Indies
Taliki 20-01-2023
USA-Scotland (Willowmoore Park-10h00)
Zimbabwe-Indonesia (Willowmoore Park-13h45)
Ikipe y’u Rwanda yasoje imikino yo mu itsinda B itsindwa n’ikipe ya England gusa ikomeza mu kindi cyiciro cy’amakipe 12 “Super 6”.
Kuri uyu wa Kane taliki 19 Mutarama 2023 ni bwo hakinwe imikino ya nyuma mu itsinda B na C mu mikino y’igikombe cy’Isi muri Cricket mu cyiciro cy’abakobwa batarengeje imyaka 19 “ICC U-19 Women’s T20 World Cup 2023”, imikino irimo kubera muri Afurika y’Epfo.
Mu itsinda B, ikipe y’u Rwanda yatsinzwe na England ku kinyuranyo cy’amanota 138.
Muri uyu mukino, ikipe ya England ni yo yatangiye ikubita agapira ishaka amanota “Batting” maze mu dupira 120 (20 Overs) ikora amanota 183 mu gihe abakinnyi 5 ari bo basohowe mu kibuga (5 Wickets).
Mu gice cya kabiri, ikipe y’u Rwanda yatangiye gukubita agapira ishaka amanota “Batting” aho yasabwaga 184. Ubwo hari hamaze gukinwa udupira 102 (17 Overs) abakinnyi b’u Rwanda bose basohowe mu kibuga (10 Wickets) mu gihe bari bamaze gukora amanota 45.
Undi mukino wo mu itsinda B wabaye, ikipe ya Pakistan yatsinze ikipe ya Zimbabwe.
Muri iri tsinda, ikipe ya England yasoje iyoboye n’amanota 6, ikurikiwe na Pakistan (4), u Rwanda (2) na Zimbabwe (0).
Mu itsinda C naho habaye imikino ya nyuma aho ikipe ya Ireland yatsinze Indonesia naho ikipe ya New Zealand itsinda West Indies.
Muri iri tsinda, ikipe ya New Zealand yasoje iyoboye n’amanota 6 ikurikiwe na West Indies (4), Ireland (2) na Indonesia (0).
Nyuma y’iyi mikino yo mu matsinda, amakipe 3 ya mbere muri buri tsinda (B na C) yakomeje mu kindi cyiciro “Super 6” aho yagiye mu itsinda rya kabiri. Aya makipe azakina hanyuma abiri ya mbere akomeze muri ½ cy’irangiza.
Ikipe ya Zimbabwe (B) na Indonesia (C) zigomba gukina imikino yo guhatanira imyanya ine ya nyuma.
Iyi mikino ikaba iteganyijwe kuri uyu wa Gatanu taliki 20 Mutarama 2023. Ikipe ya USA (A) irakina na Scotland (D) guhera saa yine (10h00) naho ikipe ya Zimbabwe (B) ikine na Indonesia (C) guhera saa saba n’iminota 45 (13h45). Imikino irabera Willowmoore Park mu mujyi wa Benoni.